Landbúnaðarsýningin og bændahátíðin SveitaSæla 2008 fór fram á Sauðárkróki um helgina í blíðskaparveðri. Hátt í fjögurþúsund gestir sóttu sýninguna heim og voru margir sammála um að mikill hátíðarbragur væri yfir svæðinu. Dagskráin var fjölbreytt og skemmtileg og óhætt er að segja að þetta sé stærsta sýningin til þessa og að aldrei hafi verið meira um að vera. Hver fermetri í reiðhöllinni var vel nýttur og dreifðist fólksfjöldinn jafnt um allt svæðið. Yfir 40 aðilar voru með vörur sínar til sölu og sýnis og má segja að sýningin hafi gegnið í alla staði mjög vel fyrir sig. Veitingasvæðið vakti mikla lukku meðal gesta og sýnenda og var bekkurinn ávallt þétt setinn. Þar var hægt að fá sér góðan heimilislegan mat og girnilegar kökur með kaffinu meðan verið var að safna kröftum fyrir nætu yfirferð um svæðið.

 Á föstudagskvöldið var boðið upp á heilgrillað naut og voru hátt í 600 manns mettaðir á þessum 240 kílóa grip, á meðan Gunnar Rögnvaldsson, kenndur við Löngumýri og Íris Olga Lúðvíksdóttir frá Flatatungu skemmtu gestum með söng og glensi. Keppnin um fjölhæfasta og sterkasta bónda norðanlands var skemmtileg og spennandi allt til loka. Það var sannarlega fjölhæfasti keppandinn sem bar sigur úr bítum að þessu sinni, Magnús Bragi Magnússon, Íbsen, hestamaður, -miðlari og smali ársins sem bætti þar við sig enn einum titlinum í safnið.

Félagar í Soroptimistaklúbbi Skagafjarðar skipuðu dómnefnd, sem fór um héraðið og völdu verðlaunahafana fyrir Umhverfisverðlaun Skagafjarðar. Það voru þær stöllur Sigurlaug Rún Brynleifsdóttir varaformaður Umhverfis og samgöngunefndar Skagafjarðar sem afhenti Umhverfisverðlaunin í ár ásamt Ingibjörgu Sigfúsdóttur formanni fjáröflunarnefndar klúbbsins. Að þessu sinni var gatan Hólatún valin fallegasta gatan, bærinn Hamar fyrir snyrtilegustu bújörðina með hefðbundinn búskap, Víðimýrarkirkja var valin snyrtilegasta stofnunin og Kimbastaðir var valinn snyrtilegasta heildsársbújörðin án hefðbundins búskapar. Listasmiðjan Bær á Höfðaströnd fékk viðurkenningu fyrir einstakt verkefni og garðurinn við Ártún 15 fékk verðlaun fyrir fallegasta garðinn í þéttbýli. Það má með sanni segja að þessir aðilar eru vel að viðurkenningunum komnir.

Mikill fjöldi barna kom til að taka þátt og hlusta á söngvakeppni Söngvaborgar sem fram fór við Tjarnabæ í sól og sumarblíðu á sunnudaginn. Vakti þessi viðburður mikla lukku meðal gesta og var kærkomin viðbót við annars góða landbúnaðarsýningu. Sólin lék aldeilis við gesti sýningarinnar og fór hitinn yfir 20°C þegar best lét.

Kálfasýningin vekur alltaf mikla eftirtekt og var svo einnig nú. Áhorfendabekkirnir fylltust á örskotsstundu þegar áhorfendur fylgdust með börnunum teyma kálfa sína fram og til baka eftir brautinni með misjöfnu miklu brasi. Voru ýmis brögð notuð til að lokka þá áfram. Þeir félagar Jón Hjálmar Ingimarsson og Leó Einarsson 5 ára gamlir, hömpuðu áhorfendabikaranum í lokin. Vöktu þeir mikla kátínu meðal áhorfenda þar sem þeir náðu að lokka kálfinn áfram með því að leyfa honum að sjúga hendina á sér, enda greyið lang yngsti kálfurinn á svæðinu aðeins 17 daga gamall. Það var svo hún Hrafnhildur Ósk Halldórsdóttir með hana Grímu frá Tunguhálsi sem bar svo sigur úr býtum í sjálfri kálfakeppninni.

Það væri of langt mál að telja upp allt sem markvert var á sýningunni og látum við því staðar numið hér í bili.

Við þökkum öllum þeim sem heimsóttu okkur á landbúnaðarsýninguna SveitaSælu 2008 kærlega fyrir komuna. Einnig viljum við þakka öllum þeim fjölmörgu sem komu að undirbúningi og framkvæmd sýningarinnar. Sérstakar þakkir fá styrktaraðilar sýningarinnar.

Sjáumst að ári liðnu

Sýningarstjórn SveitaSælu 2008

Rósa María Vésteinsdóttir, sýningarstjóri

Eyþór Jónasson, sýningarstjóri